Bevart via bilradioen
10. jan. 2025 Av: Brit Kari Urdal
Zarina hadde høyrt om Jesus på ein kassett då ho var lita jente i eit av landa i Sentral-Asia. Ho hadde teke imot Jesus, men hadde ingen rundt seg som kunne hjelpa henne på trusvegen. Tvert imot så fekk ho sterk motstand frå foreldra som mishandla henne, og som brente det ho hadde av kristne bøker. Gjennom tårer fortalte Zarina at ho trass i all motstanden hadde halde fast på trua, og no hadde ho fått stipend til å studera i Kristiansand. Ho visste ingenting om denne byen og knapt nok noko om landet ho skulle til. Då fekk ho eit ord frå Gud: "Eg har mange av mine i den byen". Den første ho møtte var ein som hadde budd i heimlandet hennar og som kunne språket. Han var det også som tok henne med opp på kontoret til Norea for å treffa staben.
– Korleis klarte du å halda fast på trua oppi alt du opplevde? undra me oss over. Svaret sjokkerte og begeistra. Ho kunne nemleg fortelja at om kveldane sneik ho seg ut i bilen til faren og lytta til kristne radiosendingar frå eit naboland.
– Programma vart mine kristne brødre og søstre, kunne ho fortelja. – Dei gav meg ord frå Bibelen og song lovsongar saman med meg.
I ei årrekkje hadde Norea finansiert desse programma, og då ho fekk høyra det, var det Zarina sin tur til å sperra opp augene.
Dette er alt nokre år sidan. Zarina held no på med doktorgradsstudiar og lever framleis med Jesus. Norea støttar framleis desse sendingane til heimlandet hennar. Det er eit stort såarbeid i tru. Historia til Zarina viser oss at det nyttar. Guds ord vender ikkje tomt tilbake, men gjer det Gud vil og fullfører det Han sender det til (Jes.55,11).
Her kan du sjå Zarina sitt vitnesbyrd. Abonner gjerne på YouTube-kanalen vår. Her ligg mykje godt stoff, og ved å abonnera, får du melding om når det kjem noko nytt på kanalen.
* Fiktivt namn
