Fred og fridom
Dei fleste av oss som bur i Noreg i dag har ikkje opplevd krig. I all vår levetid har det vore fred i landet, og me har fridom til å tala fritt, samlast fritt og ferdast fritt. Mange stader i verda er dette ukjente verdiar. Streng kontroll frå styresmaktene gjer det farleg å samlast saman med andre kristne. Derfor finst Norea. Radio- og TV-signal lar seg ikkje stoppa verken av piggtråd eller av aggressive styresmakter.
Via våre partnarar kjem det stadige tilbakemeldingar om korleis evangeliet finn vegen inn i heimar og hjarte, og skaper liv og håp. For mange er sendingane også ei livline som gjer at dei får påfyll for si kristne tru sidan dei ikkje kan samlast i fellesskap med andre truande.
Anna* er ein av dei som gjer det mogeleg å senda Håpets Kvinner-program i Sentral-Asia. På grunn av utrygge forhold i heimlandet, må ho reisa til nabolandet to gonger i året for å spela inn programma. Første gongen ho var på ei slik reise, kjende ho seg usikker: Betydde det noko det ho brukte tid og krefter på? Neste gong ho kom tilbake til nabolandet fekk ho greie på at det var ei ung kvinne som hadde ringt inn og fortalt at programmet ho hadde høyrt hadde redda henne frå å ta livet sitt. Då forstod Anna kor viktig dette var. – Programma er som ein ven for dei som ikkje kjem seg ut. Det er mange av dei, særleg på landsbygda. Men radioprogramma gjer ein forskjell. Eg får vera stemma som når dei med eit ord om oppmuntring, kunnskap og håp via radioen.
Filmen om Anna kan du sjå her.
Takk Gud for fridomen vår, og be for alle som lever under vanskelege forhold. Takk også for at det er mogeleg å nå menneske med ord frå Han som gjev evig fred og fridom.
